PRABUMULIH, Lembayungnews. –Berbagai cara warga menyampaikan aspirasi kepada para pemimpin, salah satunya dengan mengirimkan surat terbuka lewat media sosial face book: @Angga Novlianta.
Angga meneruskan surat terbuka tersebut dari sahabatnya yang berada di Jakarta yang menyebut dirinya “Ujang Tkasi Onlen” Dari surat tersebut diketahui dia berada di Jakarta dan pernah satu sekolah dengan Wakil Wali Kota Prabumulih Franky Nasril di SMAN 1 Prabumulih, berikut isi surat terbukanya:
SURAT UNTUK PAK DENI VICTORIA SAMO KAK FRANKY NASRIL – SOAL LOKAK GAWEAN SAMO UNDANGAN NGOPI
Assalamualaikum Pak Deni Victoria, Ketua DPR kito yang gagah, samo Pak Wawako Franky Nasril. Apo kabar bapak-bapak beduo? Semoga sehat selalu dan dak pening palak ngurus kota kito.
Kenalke Pak, ini aku Ujang. Sopir taksi onlen di Jakarta. Kemaren aku sempat ngirim surat, eh laju dibalas samo Angga Novlianta, budak AAC yang katonyo nak nyalon wakil walikota 2029 tu. Katonyo Pak Franky ngajak aku balek, nak ngajak ngopi langsung di Pemkot.
Jujur bae Pak Franky, saking tekejutnyo baco balasan si Angga kemaren, te-injak gas taksi aku sampe nyaris nabrak trotoar di jalan Sudirman. Ruponyo Bapak nian nyari aku. Kalo Bapak nak tau, aku ni Ujang, adek kelas Bapak waktu kito sekolah di SMA N 1 Prabumulih dulu.!
Masih ingat dak, Kak? Budak cupu yang galak nongkrong di kantin tu nah. Kalo nyebut “Pak Wawako” rasonyo kaku nian, jadi panggil Kak Franky bae la yo pecak jaman Smansa dulu.
Nah, ngomongke soal kota kito, ini ado lagi uneg-uneg yang nak ku sampeke ke Pak Deni sebagai wakil rakyat, samo Kak Franky. Kemaren kawan aku ngirim link berita dari kampung. Katonyo ado LSM di Prabumulih yang demon rame-rame, heroik nian nuntut dibukake lowongan pekerjoan untuk warga lokal di perusahaan-perusahaan.
Kuraso hebat nian awalnyo, dalem ati aku ngomong “Nah, ini baru pahlawan pembela wong cilik!”
Eh… ujung-ujungnyo ado selentingan kabar berita, katonyo oknum-oknum tu malah mintak upeti alias bejual-beli lokak gawean! Alamak jang! Pening nian palak aku baconyo.
Ini LSM (Lembaga Swadaya Masyarakat) apo yayasan penyalur pekerjo, Kak? Apo calo tiket bus di terminal? Kok pacak lokak gawean diperjual-belike cak jualan kacang rebus?
Pak Deni, Kak Franky, bingung nian aku mikirkenyo. Kalo nak masuk kerjo bae harus bayar belasan sampe puluhan juta, makmano nasib budak-budak miskin di kampung kito tu?
Banyak budak pinter, badannyo sehat, tapi katek duit nak nyogok. Nak bekebun karet, kebonnyo lah beralih fungsi jadi perumahan galo. Kalo ujung-ujungnyo lokak gawean cuma dapet di wong yang berduit, lamo-lamo budak-budak mudo Prabumulih lari ke Jakarta galo jadi sopir taksi onlen pecak aku ni. Penuh kagek aspal ibukota ni samo plat BG, Pak.
Tolong nian Pak Deni, awasi nian kelakuan oknum-oknum yang galak jualan nasib wong susah ni. Panggil perusahaannyo ke gedung DPR tu. Kak Franky jugo, tolong ditertibke yang cak-cak ini. Kasian emak-emak yang lah jual tanah, gadai motor demi anakknyo pacak begawe, eh rasonyo malah dikadalin.
Biarlah penerimaan tu bersih, transparan. Kalo nian nak merjuangke wong lokal, berjuanglah ikhlas, jangan ado udang di balik batu nisan.
Soal ajakan ngopi dari Kak Franky kemaren, insyaAllah Kak, kalo ado rejeki lebih dan tarikan lagi gacor, aku balek ke Prabumulih kito temuan. Tapi si Angga tu jangan banyak gaya nak belike tiket kereta dari Kertapati.
Dio tu jualan frozen food bae kadang balekannyo galak kurang, sok-sokan nak bayari tiket wong. Kagek bae nunggu tabungan taksi aku penuh, aku balek dewek nemui Kak Franky. Kito ngobrol soal masa depan budak-budak Prabumulih sambil ngirup cuko pempek.
Cak itu bae dula yo, Pak Deni dan Kak Franky. Maaf nian kalo baso budak perantauan ni agak kasar, tapi niat aku ni suci pecak aer wudhu. Tetap semangat ngurus kota kito!
Jakarta, 30 April 2026
Salam Hormat dari Adek Kelas Smansa,
Ujang Taksi Onlen (Budak Prabumulih yang nolak nyogok demi gawean)
